Zëvendëskryeministri i Kosovës, Besnik Bislimi, ka thënë se prapa sulmit të 24 shtatorit në Banjskë të Zvecanit qëndron Serbia.
Ai tha se Serbia ka kapacitete që ta destabilizojë Kosovën e Ballkanin. Bislimi tha se grupet kriminale serbe “janë degë e shtetit për të kryer punë të pista”.
“Dua të theksoj involvimin e akterëve të Serbisë. Serbia ka kapacitet që ta destabilizojë Kosovën dhe Ballkanin. Banjska mund të përdoret si një rast studimor. Akti i agresionit ka ngritur brengën në rajon e BE dhe për arsye se ky lloj akti mund ta zhbëj gjithë progresin që Kosova e Serbia ka bërë përmes dialogut me Serbinë.
Bislimi shtoi se raporti mes Kosovës dhe Serbisë edhe pas 11 viteve të dialog në Bruksel, nuk ka shkuar drejt përafrimit, por se ka një ftohje më të madhe.
Ai tutje theksoi se brenga kryesore është fuqia që kanë akterët shtetëror dhe para shtetërorë për të ofruar informata të gabuara apo gjysmë të vërteta drejtë luftës hibride që Serbia po e përdor në këtë periudhë.
Këto komente i dyti i qeverisë i bëri gjatë punimeve të konferencës së organizuar nga Instituti për Studime të Luftës Hibride “Octopus” me temën “Sulmi terrorist serb në Banjskë dhe implikimet rajonale dhe Gjeopolitike”.
Organizatorët e konferencës thanë se sulmi i 24 shtatorit ishte i organizuar mirë nga shteti serb.
