Policia e Kosovës ka kryer tri bastisje në territorin e Mitrovicës së Veriut dhe Zveçanit lidhur me ngjarjet në Banjskë.
Zëvendësdrejtori i Drejtorisë Rajonale Mitrovicë-Veriu të Policisë së Kosovës, Veton Elshani tha për RTKlive se Policia e Kosovës po asiston në zbatimin e vendimeve të organeve shtetërore të drejtësisë.
Ai tha se këto bastisje janë kryer në Zveçan, në afërsi të Spitalit të Mitrovicës dhe në lagjen të Boshnjakëve. Tutje tha Elshani se më vonë do të dilet me njoftime të detajuara lidhur me këto bastisje.
Mësohet se cak i bastisjeve kanë qenë pronat e bashkëpunëtorëve të Milan Radoiçiqit.
Ndryshe, ky operacion i sotëm është vazhdimësi e kontrolleve që janë bërë në kuadër të hetimeve për grupin e Milan Radoiçiqit për sulmin e Banjskës.
