Policia dhe Inspektorati Policor i Kosovës ka pranuar donacionin me 7 dronë nga Shtetet e Bashkuara të Amerikës.
Në një ceremoni të organizuar, drejtori i Policisë, Gazmend Hoxha, ka falënderuar SHBA-në për furnizimin dhe për mbështetjen. Ai e ka vlerësuar jashtëzakonisht të nevojshëm dhe të çmueshëm donacionin nga SHBA-ja.
“Do të ndikojë në ngritjen e kapaciteteve të Policisë. Po ashtu edhe në monitorimin e kufijve dhe hetime. Janë dronë dhe pajisje që janë përzgjedhur dhe selektuar nga ekspertët e Policisë së Kosovës. Unë mund të garantoj ambasadorin (Jeffrey Hovenier, SHBA), që Policia të gjitha këto pajisje do t’i përdorë për qëllime të ligjshme në mënyrë që të sigurojë shërbime më kualitative për të gjithë qytetarët”, ka deklaruar Hoxha.
Ambasadori amerikan, Jeffrey Hovenier, dronët e pranuara, i ka cilësuar burim jetik për organet e zbatimit të ligjit në Kosovë.
“Sigurojnë mbikëqyrje dhe ofrojnë mbështetje taktike për misionet policore”, ka thënë ai. Sipas tij, dronët mund të përdoren për të luftuar kontrabandimin e migrantëve, narkotikëve e të tjera.
Hovenier, ka thënë se donacioni i fundit është vazhdimësi e qëndrimit mbështetës të SHBA-së për Kosovën.
Drejtori i Inspektoratit Policor të Kosovës, Taulant Hodaj, ka theksuar se pajisje të tilla do t’i ndihmojë që ta mbajmë lartë profesionalizmin dhe ta monitorojmë punën e Policisë.
“Si IPK po mundohemi që të jemi të përkushtuar që ta mbajmë nivelin e profesionalizmit të Policisë së Kosovës. Mbështetja me këshilla e me pajisje, ka bërë që të ngritet profesionalizmi për Policinë e Kosovës. Pajisje të tilla siç janë këta dronë, do na ndihmojë që ta mbajmë lartë profesionalizmin dhe ta monitorojmë punën e Policisë”, ka deklaruar ai.
