Avokati i njohur, Tomë Gashi, në një postim në profilin e tij në facebook, ka bërë thirrje për një protestë paqësore në kërkim të drejtësisë për siç thotë vrasjen e Astrit Deharit. Ai madje në këtë posim pyet nëse mjaftojnë 10 ditë për ta organizuar një protestë të dinjitetshme dhe paqësore, në kërkim të drejtësisë për vrasjen e Astrit Deharit?
“Aktivisti i Lëvizjes VETEVENDOSJE!, Astrit Dehari, është vrarë në Qendrën e Paraburgimit në Prizren, më 05.11.2016.
Një prokuror, përkundër fakteve, kishte tentuar ta mbyllte rastin e vrasjes së Astrit Deharit si vetëvrasje!
Një prokuror tjetër, përkundër fakteve, ka zgjedhur heshtjen – në vend që të zgjedhë marrjen e një aktvendimi për fillim të hetimeve në drejtim të identifikimit të vrasësve të Astrit Deharit, të shtytësve në vrasje, dhe të atyre që po e fshehin vrasjen qe 7 vite!
Një president, njërit prej dëshmitareve kyç që ishte në qeli me Astritin, edhe pse të dënuar për vrasjen e një femiu, në mënyrë të kundërligjshme, ia kishte falur 3 apo 4 vite burgim dhe askush nuk kishte bërë asgjë!
Një zyrtar i larte i Policisë ne Prizren, rrejshëm kishte deklaruar kinse Astriti ka vdekur nga përdorimi i tepërt i barnave… Edhe pse ky deklarim ishte skandaloz dhe kishte për qëllim manipulimin e opinionit, askush nuk kishte bërë asgjë!
Një ish Ministre e Drejtësisë, në vitin 2016, kishte kërkuar nga Kryeprokurori i Shtetit që t’i ndjekë penalisht ekspertët e pavarur, të cilët me ekspertizë kishin vërtetuar se Astriti është vrarë!
Një ekspertizë e Institutit Zviceran të Mjekësisë Ligjore e kishte eliminuar edhe teorinë e vetëvrasjes, e kishte vërtetuar praninë e ADN-së së personave të tretë, si dhe kishte propozuar hetim të pavarur – gjë që kurrë nuk është bërë!
Një ekspertizë e dytë, e të njëjtit Institut – Zviceran – e kishte vërtetuar ekspertizën e parë dhe kishte vërtetuar se një pjesë e provave të dërguara ne Zvicër ishin të manipuluara! Familja e Astrit Deharit kishte kërkuar hetim penal edhe për këtë çështje – gjë që kurrë nuk u bë!
I vodhën mostrat e Astrit Deharit në Institutin e Mjekësisë Ligjore dhe asgjë nuk u bë – sepse Prokurori zgjodhi heshtjen!
Për këto 7 vite janë pothuajse 1000 skandale të institucioneve të ndryshme në rastin e hetimit të vrasjes së Astrit Deharit dhe thuajse të gjitha më shumë kanë anuar që ta devijojnë rastin se sa ta thonë të vërteten. Duket se dikush dëshiron ta mbrojë dikënd dhe për këtë arsye e vërteta nuk po thuhet.
Me 5 nëntor 2023 bëhen 7 vite nga vrasja e Astrit Deharit dhe ende nuk ka drejtësi. Meqenëse 5 nëntori i bie ditë e diele, protesta është mirë të organizohet me datë 3 – të premten. A ka mbet naj shok i Astritit apo jo?”, ka shkruar ai. /Kosovatimes/
