Gjykata Themelore në Prishtinë ua ka vazhduar paraburgimin edhe për dy muaj tre të dyshuarve VT, BS dhe DM për “sulmin terrorist” ndaj Policisë së Kosovës në Banjskë .
Lajmin për “Betimin për Drejtësi” e ka bërë të ditur zëdhënësja e kësaj gjykate, Mirljinda Gashi.
“Lidhur me kërkesën tuaj për informim, ju njoftojmë se pas kërkesës së Prokurorisë Speciale të Republikës së Kosovës për vazhdimin e masës së paraburgimit në rastin penal ndaj të pandehurve VT, BS dhe DM, Gjykata Themelore në Prishtinë – Departamenti Special ka vendosur për kërkesën e Prokurorisë Speciale të Republikës së Kosovës. Gjykata Themelore në Prishtinë – Departamenti Special ka miratuar kërkesën e Prokurorisë Speciale të Republikës së Kosovës, që të pandehurve VT, BS dhe DM t’u caktohet masa e paraburgimit në kohëzgjatje prej 2 (dy) muajsh, për secilin veç e veç. ”, thuhet në përgjigjen e gjykatës, të cilën e transmeton Kossev.
Në Banjskë të Zveçanit, në orët e para të 24 shtatorit 2023, u vra rreshteri Afrim Bunjaku dhe u plagosën dy të tjerë. Më pas tre sulmues u vranë, ndërsa të tjerët u larguan pas disa orësh strehim në manastirin e Banjskës.
Ministri i Brendshëm Xhelal Sveçla publikoi fotografi të Milan Radoiçiqit, ku theksoi se Radoiçiq është lideri i këtij “grupi terrorist” dhe sulmi në të cilin u vra një polic.
Përgjegjësinë për “sulmin terrorist” e mori vetë Radoiçiq.
