Vendimi i komunës së Prishtinës për zhbllokimin e trafikut nuk i pëlqen Dhomës së Tregtisë dhe Industrisë

Kuvendi komunal i Prishtinës ka marrë një vendim sipas së cilës ndalohet qarkullimi i mjeteve transportuese të mallrave gjatë ditës me qëllim të zhbllokimit të trafikut që mbetet një nga sfidat kryesore të kryeqendrës. Por me këtë vendim janë shprehur të pakënaqur dhoma e Tregtisë dhe Industrisë në Kosovë e cila mendon se po i bënë dëm bizneseve sidomos industrisë së ndërtimit. Në shumicën e vendeve perëndimore furnizimi i tregjeve dhe hipermarketeve bëhet në orët e mbrëmjes. Por tek ne ndodhë e kundërta. Por ndryshe mendon Dhoma e Industrie e cila ka reaguar duke shfaqur shqetësimin e saj të thellë lidhur me Vendimin e Komunës së Prishtinës sipas të cilit qarkullimi i mjeteve transportuese të mallrave – furnitorëve në kryeqytet lejohet më së gjati në orarin nga ora 19:00 deri të nesërmen në orën 07:00 (varësisht nga zonat). Lidhur me mosrespektimin e këtij Vendimi, sipas njoftimit të Komunës inspektorati komunal ka dal në teren dhe ka ndaluar qarkullimin e makinerisë si dhe ka shqiptuar gjoba në vlera jashtëzakonisht të larta për vozitësit e automjeteve transportuese të mallrave shih Njoftimin nëfaqen zyrtare të komunës në Facebook.. “Siç është e ditur, në zonat e përmendura në Vendimin e lëshuar nga Komuna e Prishtinës, me leje të kësaj të fundit janë duke u ndërtuar shumë objekte afariste-banesore që aktualisht gjenden në faza të ndryshme të ndërtimit dhe për realizimin e të cilave është i domosdoshëm mbarëvajtja e furnizimit me materiale nga ana e furnitorëve të ndryshëm”, thuhet në reagim. Sipas tyre furnizimi me mallra sipas orarit të përcaktuar me Vendimin e tanishëm është bllokim i punës për të gjithë sektorët e biznesit dhe mbi të gjitha është shumë vështirë i zbatueshëm për vendin tonë. “Andaj, kufizimi i qarkullimit në orarin e përcaktuar pothuajse e pamundëson tërësisht procesin e furnizimit me mallra veçanërisht duke patur parasysh që ky Vendim nuk është bazuar në nevojat e zonës në fjalë, nuk janë mbajtur mjaftueshëm takime për të marrë qëndrimet e palëve të interesit në mënyrë që të ofrohet ndonjë alternative më e përshtatshme pa cunguar veprimtarinë e bizneseve”. Zbatueshmëria e një Vendimi të tillë për bizneset të cilat pikë kryesore kanë kryeqytetin për ushtrimin e veprimtarisë së tyre afariste është fatal, andaj si Dhomë e Tregtisë dhe Industrisë Kosovë kërkojmë nga Kryetari dhe Komuna e Prishtinës pezullimin e menjëhershëm të këtij Vendimi. Njëkohësisht, kemi përcjellë kërkesë për takim urgjent me Kryetarin e Komunës z. Përparim Rama me qëllim të arritjes së një marrëveshje të favorshme për të dyja palët. /Kosovatimes/