Kryetari i AAK-së, Ramush Haradinaj tha se Kosova nuk mund të jetë peng i destruktivitetit të Serbisë, por se sipas tij, ajo duhet të vazhdojë perspektivën e saj që është anëtarësimi në NATO dhe integrimi në BE.
Haradinaj përmes një postimi në Facebook, ka thënë se Kosova në vazhdimësi ka dëshmuar se është pro vlerave perëndimore dhe euroatlantike dhe gjithnjë konstruktive në qasjen e saj për të arritur një marrëveshje përfundimtare për njohje të ndërsjellë me Serbinë.
“Serbia nga ana tjetër në vazhdimësi ka sabotuar përpjekjet për një marrëveshje të qëndrueshme paqeje midis dy vendeve duke synuar ta rikthejë kohën e konfliktit. Nuk ka asnjë dyshim se këtë kurs po e ndjek edhe sot”, ka shkruar Haradinaj.
Haradinaj tha se Kosova në një situatë të tillë, pa e pasur nevojën të dëshmojë sa e keqe është Serbia, duhet ta ndjek kursin e saj euroatlantik dhe t’i përmbush obligimet e marra, duke zbatuar pa vonesë planin franko-gjerman.
