Ndërmarrja “Trepça” ka marrë vendim për suspendimin nga puna të kryetarit të Sindikatës së Pavarur të Minatorëve, Ibrahim Jonuzi. Lidhur me këtë ka reaguar ish-kryeministri, njëherësh deputeti i LDK-së Avdullah Hoti, duke e quajtur këtë vendim të pa paprecedent dhe absurd.
Ai tha se tani është koha për të negociuar e jo për t’i hedhur benzinë zjarrit.
“Ndërkohë që minatorët vazhdojnë grevën, menaxhmenti i Trepçës shkarkon udhëheqësit e sindikatës së minatorëve. Kjo është e paprecedent. Ky mentalitet ndëshkues i menaxhmentit është absurd në kohën kur greva po vazhdon në ditën e shtatë. Ky veprim nuk është në funksion të gjetjes së zgjidhjes. Përkundrazi, edhe nëse menaxhmenti ka ligjërisht të drejtë për veprimet e ndërmarra, tani është koha për të negociuar 24 orë për të gjetur zgjidhje të balancuar e të pranueshme për të gjitha palët. Nuk është koha për t’i hedhur benzinë zjarrit. Shëndeti i minatorëve është mbi të gjitha”, ka shkruar Avdullah Hoti.
