Komuna e Prishtinës është dakorduar me bizneset për orarin e ri të qarkullimit të mjeteve motorike për furnizim me mallra nga subjektet afariste.
Përmes një komunikate Dhoma e Tregtisë njofton se pas takimeve intensive të zhvilluara në mes të Grupit të Biznesit dhe Komunës së Prishtinës, palët janë dakorduar për vendosjen e një orari të ri të lëvizjes për furnitorët rreth qarkullimit të mjeteve motorike për furnizim me mallra nga subjektet afariste.
Orari i ri i qarkullimit për furnitorët i cili do të fillojë të aplikohet pas njoftimit zyrtar që pritet të publikohet nga Komuna e Prishtinës është: Lejohet qarkullimi i mjeteve motorike nga ora 10:00 deri në orën 15:00; si dhe nga ora 18:00 deri në orën 07:00.
“Dhoma e Tregtisë dhe Industrisë Kosovë që nga fillimi i aplikimit të Vendimit të Komunës së Prishtinës për kufizimin të qarkullimit të mjeteve motorike për furnizim me mallra nga subjektet afariste, ka reaguar që ky Vendim fillimisht të pezullohet deri në arritjen e një marrëveshje e cila është e përshtatshme për të dyja palët, gjë e cila tashmë ka ndodhur”, thuhet në komunikatë.
