Kryetari i Grupit Parlamentar të AAK-së, Besnik Tahiri, ka thënë se kryeministri me mungesën e transparencës ka krijuar klimë toksike në dialog e ka bërë që ndaj Kosovës të vendosen sanksione.
Tahiri ka kërkuar që draftstatuti për Asociacionin të bëhet publik.
“Është për keqardhje që përmes këtij raportimi të vonuar po mësojmë gjëra që Albin Kurti me dashje a pa dashje po i bën favor Aleksandër Vuçiqit duke i mbajtur informacionet konfidenciale. Një qasje e tillë nuk do të duhej ta kishte një kryeministër. Mungesa e transparencës tregon për një klimë toksike është krijuar në dialog. Serbia ka interes për status quo. Tek pjesa e jashtme Kurti me eksperimente ka arritur të krijojë klimë që ndaj Kosovës të vendosen masa sanksionuese. Ky kryeministër e ka shkelur të gjithë filozofinë e vet politike prej ditës së parë e deri sot për të arritur qëllimin e vet. Unë po e pyes kryeministrin e Kosovës publikisht. A mund të na tregoj cili është ky draft? AAK duke e parë ndjeshmërinë në të cilën gjendemi ka ditur që në cilat momente t’i japim mbështetje. Llogaria dhe përgjegjësia bie te ti”.
