Njohësit e çështjeve politike në vend besojnë se zgjedhjet në Serbi do të jenë një faktor që mund të ngadalësojnë procesin e dialogut. Madje disa thonë se Kosova do të jetë një nga temat kryesore të fushatës zgjedhore atje.
Zgjedhjet në Serbi, medoemos do të ndikojnë në procesin e dialogut Kosovë-Serbi, thonë njohës të rrethanave politike në vend. Për Artan Muhaxhirin, çështja e Kosovës do të jetë pjesë e diskursit politik gjatë fushatës së presidentit serb atje.
“Është e pritshme që zgjedhjet në Serbi të ndikojnë në mënyrë të rëndësishme në procesin e dialogut, sepse presidenti Vuqiq do ta fuqizojë diskursin e tij popullist dhe emocional në raport më Kosovën në mënyrë që të përfitojë nga votat e kategorisë së votuesve jokritikë”, deklaroi Muhaxhiri.
Drejtori ekzekutiv i Qendrës për Zgjedhje të Lira dhe Demokratike (CESID), Bojan Kllaçar, thekson se politikanët në fushatë merren me ato tema që i interesojnë elektoratit dhe njëra prej tyre është edhe Kosova.
“…Kosova do të jetë një nga temat më të rëndësishme të fushatës në Serbi. Sigurisht që do të jetë në tri të parat për dy arsye: e parë është e një natyre kontekstuale, pasi dialogu është i gjallë, është në vazhdim dhe është një temë e rëndësishme për interesat politike serbe dhe e dyta; që nga fillimi i këtij viti Kosova ka qenë një nga tri prioritetet kryesore të popullit, krahas ekonomisë, inflacionit, gjegjësisht rritjes së çmimeve”, deklaroi Klloçar.
Ndryshe njohësi i çështjeve politike në vend, Gazmir Rraci, thotë se për sa i përket zgjedhjeve të parakohshme në 4 komunat veriore në Kosovë, tani për tani nuk ka klimë që ato të mbahen. Ai e lidh këtë me pajtueshmërinë që mund të arrijnë palët Kosovë-Serbi lidhur me propozimin e planit për Asociacionin, i cili u është dorëzuar palëve nga BE më 21 tetor.
