Kryeministri i Kosovës, Albin Kurti u takua ditën e sotme me përfaqësues nga komuniteti kroat në Kosovë, të cilëve u premtoi mbështetje në të gjitha sektorët, politike, kulturore dhe ekonomike. Në këtë takim ishte e pranishme edhe zëvendëskryeministrja Emilija Rexhepi, ndërsa temë e diskutimit ishte bashkëpunimi i Qeverisë me komunitetin dhe njohja më thellësisht me nevojat e tyre.
Të pranishëm në takim ishte edhe ambasadorja e Kroacisë në Kosovë, Danijela Barisiq dhe përfaqësuesit kroatë në Këshillin Konsultativ të Komuniteteve pranë Presidencës, Josip Cirimotic dhe Silvana Palic.
Sipas njoftimit për media, në takim është diskutuar për angazhimin e Qeverisë me komunitetin gjatë vitit, derisa kryeministri ka shprehur kënaqësinë që ka marrë pjesë në Meshën e Krishtlindjes në Kishën e Janjevës, si dhe ka marrë pjesë në festimin e 720 vjetorit të Kishës në Janjevës.
Gjithashtu, në takim është trajtuar ndihma e Qeverisë dhënë për qytetarët në Janjeva, të përzgjedhur nga komisioni për grante nga Zyra për Çështje të Komuniteteve, dhe për zbatimin e plotë të Ligjit për përdorimin e gjuhëve, në mënyrë që komunitetet joshumicë të kenë qasje në komunikimet prej qeverisë.
Përfaqësues të komunitetit kroat kanë falënderuar kryeministrin për mundësinë për të bashkëbiseduar mbi sfidat e tyre dhe mundësinë për bashkëpunim. Ata veçuan nevojën për mbështetje infrastrukturore në Janjevë, thuhet në njoftim. Ndërsa kryeministri Kurti shprehu gatishmërinë për të punuar në sigurimin e kushteve sa më të mira për komunitetin kroat në Kosovë.
