Policia e Kosovës në bashkëpunim me Doganën e Kosovës kanë gjetur dy automjete me mallra të kontrabanduara, njëra në Viti, e tjetra në Leposaviq.
Rasti i parë ka ndodhur në rrugën Kabash – Smirë, teksa ngasësi i automjetit ka tentuar të ik, ku ka shkaktuar pastaj aksident trafiku me njërën nga veturat e Policisë së Kosovës. Të dyshuarit me iniciale M.M. u janë gjetur mallra të ngarkuara në vlerë mbi 25.000 euro, të cilat dyshohen se janë kontrabanduar nga rrugë ilegale.
“Lidhur me rastin të gjitha veprimet janë ndërmarrë në bashkëpunim me Prokurorinë e Shtetit, ku me urdhër të prokurorit kompetent në Gjilan i dyshuari është ndaluar për 48 orë, ndërsa malli dhe automjeti i përfshirë në rast dërgohen në terminalin doganor Dheu i Bardhë”, thuhet në njoftimin e Policisë.
Ndërkaq rasti i dyti ka ndodhur në fshatin Jellakce, ku automjeti që barte mallra të kontrabanduara ka qenë edhe pa targa.
“Po ashtu në të njëjtën datë, në rajonin e veriut, gjatë një patrullimi nga NjNSh në Jarinje është gjetur një veturë e braktisur në fshatin Jellakce, ku e njëjta po ashtu ishte pa targa, në të cilën ndodheshin mallrat e kontrabanduara (pijet alkoolike dhe të gazuara)”, vazhdon komunikata.
Lidhur me rastin në vendngjarje kanë dalë njësitë përkatëse policore, është bërë tërheqja e mjetit i cili është dërguar në terminalin doganor Mitrovicë, në ndërkohë që janë ndërmarrë të gjitha veprimet e nevojshme policore, për procedurat e mëtejme hetimore.
