Presidentja e Kosovës, Vjosa Osmani gjatë adresimit të saj në Samitin e Tretë të Diasporës, i cili po mbahet në Tiranë, ka thënë se mërgata shqiptare ka qenë burimi i forcës drejt lirisë e demokracisë. Ajo ka çmuar kontributin e tyre në kohën e luftës në Kosovë.
“Mërgata shqiptare është shtylla e lëvizjes kombëtare për liri e pavarësi të shqiptarëve. Solidariteti dhe mbështetja e tyre e palëkundur ka qenë burim force për ne, në rrugëtimin tonë drejt lirisë, pavarësisë e demokracisë. Në vitet e 80-ta e 90-ta, mërgata jonë ishte zëri ynë në të gjitha qendrat e vendimmarrjes, nga Washingtoni në Bruksel, nga Berlini në Paris e Romë e shumë vende të tjera”, deklaroi presidentja e Kosovës.
Ajo ka thënë se mërgata shqiptare është një, nga çdo pjesë e territoreve shqiptare. Osmani ka përmendur edhe Luginën e Preshevës, duke thënë se qëndrojnë me ta në mbrojtje të të drejtave të tyre.
“Mos të harrojmë se vëllezërit dhe motrat tona në Preshevë, Medvegjë dhe Bujanoc, akoma përballen me diskriminim sistematik, që rezulton edhe me spastrim etnik nëpërmjet mjeteve administrative. Si gjithnjë, u themi edhe sot, ju nuk jeni vetëm, të gjithë jemi bashkë me juve në mbrojtjen e të drejtave të juaja”, theksoi tutje Osmani.
Begaj nga Samiti i Diasporës premton të drejtë vote për mërgatën
Tirana është nikoqire e Samitit të Tretë të Diasporës, aktivitet ky që mbahet si shenjë mirënjohje ndaj bashkatdhetarëve të cilët ndër vite kanë kontribuar nga vende anekënd botës për Shqipërinë, Kosovën, Maqedoninë e Veriut dhe Malin e Zi.
Presidenti i Shqipërisë, Bajram Begaj, gjatë adresimit të tij para të pranishmëve ka thënë se diaspora është promoterja më eminente e kulturës dhe identitetit tonë. Duke theksuar se shqiptarët e diasporës përherë kanë kontribuuar për atdheun e tyre, ai ka bërë thirrje për bashkëpunim të vazhdueshëm me shtetin shqiptar.
“Unë do të vijoj të mbështes punën e nisur nga institucionet shqiptare për shpërndarjen e librave shqip nga autoritetet shtetërore për komunitetet shqiptare në diasporë. Fëmijët duhet të kenë mundësi të mësojnë shqip kudo që të jenë”, ka theksuar Begaj.
Sipas tij, Shqipëria mund të jetë e kompletuar kur shqiptarët e diasporës ndjehen dhe kanë të drejta të plota në vendin e tyre. E një nga format që ai ka përmendur është përfaqësimi politik.
“Qytetarët shqiptarë jashtë vendit duhet të kenë mundësi ta ushtrojnë të drejtën e tyre kushtetuese për të votuar, pa pasur nevojën të vijnë në Shqipëri. Kjo do të kthejë diasporën në aktore të drejtpërdrejtë të konfigurimit politik e administrativ”, ka theksuar presidenti shqiptar.
Ahmeti: Të rinjtë të kontribuojnë për atdheun përmes kapjes së diturisë në universitetet më të mira të botës
Kreu i partisë shqiptare në Maqedoninë e Veriut, BDI, Ali Ahmeti në Samitin e Tretë të Diasporës ka thënë se është koha për organizim më të mirë të shqiptarëve për zhvillim shtetërore.
“Sot kemi një luftë të re dhe më të fortë, të organizohemi për atdheun tonë dhe këtë mundësi mërgata e ka. Të gjithë të përkushtohemi, të gjithë të rinjtë le të kapin diturinë në universitetet më të mira të botës dhe t’i kthehen atdheut të tyre. Sot me dituri shumë shpejt mund t’i kemi vendet tona në Bashkimin Evropian”, ka theksuar Ahmeti.
Kryetari i Komunës së Tuzit, Nik Gjeloshaj, ka çmuar veçanërisht kontributin e bashkatdhetarëve në Shtetet e Bashkuara të Amerikës.
“Diaspora e shqiptarëve nga Mali i Zi shumë herë gjatë historisë ka pasur rolin kyç dhe vendimtar. Duhet të veçoj diasporën në Shtetet e Bashkuara të Amerikës, të cilët ishin ata që hapën dyert e Kongresit Amerikan që të dëgjohej gjithë ai represion që ndodhte në Kosovë nga krimineli Millosheviq”, ka thënë Gjeloshaj.
E kryetari i Preshevës, Shqiprim Arifi, ka thënë se vet është “produkt i diasporës”, duke qenë se ka jetuar disa vite jashtë vendit dhe si i tillë i kupton hallet e shqiptarëve kudo në botë.
“Pavarësisht të gjitha sfidave që i përjetoni atje, jeni shembull i vërtetë i një diaspore e cila nuk përshkruhet vetëm me fjalë sepse edhe me mos prezencë kontribuoni në vazhdimësi në vendin tonë”, ka thënë Arifi.
Ai ka thënë se përderisa Tirana dhe Prishtina nuk e kuptojnë se duhet të ruajnë trojet shqiptare si Lugina e Preshevës, atëherë rrezikohen edhe dy kryeqendrat.
“Ne nuk e kemi një front të hapur me Serbinë,e kemi një front të padukur që përdoret çdo ditë nga Serbia për të thënë se shqiptarët e Preshevës janë të një niveli të dytë”, ka theksuar Arifi.
