Ka ndërruar jetë në moshën 73-vjeçare Mjeshtri i Madh i humorit shqiptar, Zef Deda, e Shkodra dhe Shqipëria humbën një emër të madh të artit dhe humorit.
Artisti shumëdimensional vdiq në qytetin e tij të lindjes pas një sëmundje të rëndë që e kishte prekur prej pak kohësh.
Zef Deda është një nga komedianët më të mirë të Shqipërisë, i cilësuar edhe si Charlie Chaplini shqiptar.
Ai lindi në Shkodër më 27 korrik 1950. Është shkolluar në qytetin e tij të lindjes, dhe në politeknikumin e ndërtimit në Tiranë. Filloi shkollën e lartë për gjuhë – letërsi, por nuk e mbaroi dot për arsye shëndetësore. Ka punuar për më shumë se 40-vite në Teatrin Migjeni të Shkodrës. Talenti i tij spikati që në moshë të vogël, pasi me një shkathtësi dhe me një plastikë të shkëlqyer psiko-fizike ai arriti të realizonte qindra figura artistike.
Pas një shkëputje prej 6 vitesh, për shkak te emigrimit jashtë atdheut, ai kthehet në vitin 1996 në Shqipëri për të ushtruar profesionin e aktorit, të cilin e vazhdon me shumë sukses. Zef Deda është i martuar me Rozina Dedën dhe ka dy djem, Julian Deda dhe Marjan Deda. Zef Deda gjithashtu ka interpretuar edhe shumë komedi si: “Vëllai nga babai”, “Kollovari”, “Big Brother Shkodra 1”, “Big Brother Shkodra 2″, etj.
Rolet Kryesore: Kunati i shokut Xhemal, Kola i dritave, Charlie Chaplin (imitim) , Kushëriri nga Amerika, Altini (altufi) Dhjetëra emisione për fëmijë, Gjurmë në kaltërsi” 1981, etj.
