Emisari i Britanisë së Madhe për Ballkanin Perëndimor, Stuart Peach, ka qëndruar për vizitë në Serbi ku është takuar me komandantin e përgjithshëm të Ushtrisë Serbe, Milan Mojsiloviq.
Sipas njoftimit të Ministrisë së Mbrojtjes të Serbisë, Mojsiloviq ka thënë se Serbia respekton në vazhdimësi Marrëveshjen Tekniko-Ushtarake dhe në pajtim me Rezolutën 1244 dhe e njeh KFOR-in si garantuesin e vetëm të sigurisë të popullatës serbe në Kosovë.
Gjatë qëndrimit në Beograd, Peach ka takuar edhe presidentin e Serbisë, Aleksandër Vuçiq, kryeministren serbe, Ana Bërnabiq dhe kryetarin e Kuvendit, Ivica Daçiq.
Vizita e emisarit britanik në Beograd vjen pas raportimeve për vendosjen e trupave britanike në kufi me Serbinë, për të siguruar Kosovën dhe për të mos lejuar futjen e armatimit apo grupeve të armatosura brenda territorit të Kosovës.
