Në Ditën Ndërkombëtare të Personave me Aftësi të Kufizuara, këta persona në Kosovë po vazhdojnë të përballen me sfida të shumta. Drejtues të organizatave për mbrojtjen e personave më aftësi të kufizuara kanë bërë të ditur se sfidat që përballen këta persona janë: mospërfshirja në institucionet edukativo arsimore, punësimi, mungesa e infrastrukturës së përshtatshme e shumë të tjera.
Përkundër që ndër vite janë bërë përpjekje në përmirësimin e kushteve për personat më aftësi të kufizuara, këta persona vazhdojnë të përballen me shumë sfida në arsimim, punësim, mungesë të infrastrukturës e marrjes së shërbimeve të domosdoshme sociale e shëndetësore. Se më të vërtetë këta persona përballen më sfida të shumta, e thotë për Radio Kosovën, Sabina Lloqani, e cila jeton e vetme në karrocë.
“Gjendja jonë është tmerruese. Kemi nevojë shumë për asistent, për arsye se pa asistent na nuk mundemi as me punua, edhe nëse na ofrohet ndonjë mundësi. Me të vërtetë tmerr. Ka infrastruktura jemi shumë të dëmtuar”, tha Sabina Lloqani.
Edhe, Kaltrina Misini, nga organizata “ HANDIKOS” , i tha Radio Kosovës së në Ditën Ndërkombëtare të Personave me Aftësi të Kufizuara kjo kategori e qytetareve vazhdon të jetë e diskriminuar dhe se institucionet përgjegjëse duhet të bëjnë më shumë për përmirësimin e jetës së kësaj kategorie.
“ Personat më aftësi të kufizuar vazhdojnë të mbetem kategoria më e diskriminuar në shumë fusha të jetës. Sfidë mbetet punësimi, qasje në edukimin e fëmijëve, infrastruktura jo e përshtatshme, marrja e shërbimeve sociale dhe shëndetësore të mirëfillta. Mbeten shumë sfida dhe shumë gjëra që duhet të bëjnë institucionet përgjegjëse dhe se kjo është përgjegjësi e shtetit”, tha Misini.
Edhe, Fazile Bungu nga organizata për personat me aftësi të kufizuara “Hendifer” në Ferizaj i tha Radio Kosovës se personat më aftësi të kufizuara përballen më shumë sfida, duke filluar nga edukimi dhe mungesa e infrastrukturës së përshtatshme për këta fëmijë.
“Fëmijët e përfshirë në arsimin e rregullt, mund të them se rezultatin që ata e arrijnë është i barabartë më zero. Kanë shumë nevojë për logopedë dhe psikologë. E shkollat edhe pse i kanë psikologët dhe logopedët, nuk merren fare me këta fëmijë. I marrin i çojnë nëpër shoqata se thonë që nuk munden me punua me ta. Po ashtu, nuk ka infrastrukture të përshtatshme për nevojat e tyre”, u shpreh Bungu.
Personat me aftësi të kufizuara vazhdojnë të mbesin një ndër kategoritë më të diskriminuara në Kosovë. Kësaj kategorie po i shkelen të drejtat elementare të garantuara më ligj, për edukim, lëvizje të lirë dhe qasje në institucione publike.
