Ambasadori amerikan në Serbi, Christopher Hill, ka deklaruar sot se zyrtarët evropianë insistojnë në normalizimin e marrëdhënieve ndërmjet Kosovës dhe Serbisë, e jo në njohje reciproke, teksa ka thënë se një gjë e tillë nuk është në tavolinë.
“Para së gjithash, ajo që është në tryezë, natyrisht, nuk është njohja. Ajo është normalizimi. Edhe unë mendoj se situata duhet të normalizohet. Njerëzit në veri të Kosovës duhet të zgjohen në mëngjes duke e ditur se si do të jetë jeta e tyre. Duhet të ekzistojë mundësia që njerëzit të udhëtojnë kudo që duan. Duhet të ketë mirëkuptim për të gjitha këto çështje”, tha Hill në një intervistë për Euronews Serbia.
I pyetur për mesazhet nga vendet kryesore evropiane – Gjermania, Franca dhe Italia, liderët e të cilave shtete i kanë bërë thirrje Beogradit që të bëjë njohjen ‘de facto’ të Kosovës, Hill theksoi se “patjetër duhet pasur kujdes në zgjedhjen e fjalëve”, por shtoi se SHBA këtë e kupton si kërkesë për normalizim të marrëdhënieve.
“E di që fjalët janë të rëndësishme. Fjalët janë veçanërisht të rëndësishme në kohë zgjedhjesh. Megjithatë, nuk dua të futem në lojë fjalësh. Ajo që dua të them është se ajo që është në tavolinë është e njohur për të dyja palët. Serbia në thelb pranoi atë që ishte në të. Ka një mirëkuptim për të ecur përpara dhe kjo është e bazuar në këto marrëveshje. Sinqerisht mendoj se ka pasur shumë progres, por kjo çështje duhet të zgjidhen njëherë e përgjithmonë. Kjo është në interes të Serbisë dhe të Kosovës”, shtoi Hill.
Hill ka shprehur shpresën se Kosova dhe Serbia mund të arrijnë një marrëveshje sa më shpejt që të jetë e mundur, por pranoi se sulmi terrorist në Banjskë, më 24 shtator, ka thyer besimin e fituar me shumë vështirësi mes dy palëve.
Ai tha se është e nevojshme të sqarohen të gjitha çështjet që kanë të bëjnë me atë që ka ndodhur në Banjskë dhe shtoi se në të ardhmen duhet të bëhen përpjekje që të mos përsëriten gjëra të ngjashme.
