Në kuadër të vizitës zyrtare në Shtetet e Bashkuara të Amerikës, ministri i Mbrojtjes, Ejup Maqedonci, sot u prit në takim në Departamentin e Shtetit nga Ndihmëssekretari i Shtetit për Çështje Evropiane dhe Euroaziatike, James O’ Brien.
O’Brien në platformën ‘X’ ka shkruar se SHBA-të vazhdojnë mbështetjen ndaj FSK-së.
“Ne e mbështesim Forcën e Sigurisë së Kosovës ndërsa ajo kalon në një forcë mbrojtëse territoriale multi-etnike, profesionale, të ndërveprueshme nga NATO-ja, që i nënshtrohet mbikëqyrjes civile. Kënaqësi takimi me ministrin kosovar të Mbrojtjen, Ejup Maqedonci sot dhe riafirmojmë partneritetin tonë me Kosovën”, ka shkruar ai.
Ndërkaq, sipas komunikatës së Ministrisë së Mbrojtjes, ministri Maqedonci ritheksoi që Qeveria dhe populli i Kosovës janë të vendosur palëkundshëm në rrugën drejt integrimeve euro-atlantike.
“Me këtë rast, ministri e falënderoi Ndihmëssekretarin O’Brien për mbështetjen e palëkundur dhe të vazhdueshme të Shteteve të Bashkuara të Amerikës për Republikën e Kosovës, e në veçanti për mbështetjen në fushën e mbrojtjes dhe sigurisë. Ata diskutuan për ambientin global të sigurisë dhe impaktin e tij në regjionin e Ballkanit perëndimor, si dhe për nevojën e fuqizimit të përpjekjeve të përbashkëta për t’u përballur me rreziqet dhe kërcënimet”, thuhet në komunikatën e Ministrisë së Mbrojtjes.
