Ansambli Kombëtar i Këngëve dhe Valleve “Shota” është në përgatitjet finale të koncertit të fundvitit. Valltarët e këtij ansambli, të hënën, në skenën e Teatrit Kombëtar të Kosovës do t’i ofrojnë publikut atmosferë festive.
“Kemi këngë dhe valle të ndryshme, kemi rikthim të një valle e cila është luajtur para 20 vjetësh prej profesorit Haki Mulliqi. E veçanta e kësaj valle është se është nga Malësia e Madhe, është tradicionale e cila është promovuar që nga koha ilire”, ka thënë drejtori gjeneral i Shotës, Mehmed Xhemajli.
Ai tutje ka bërë me dije se pjesa tjetër e programit do të karakterizohet nga vallet çame, vallet festive e valle të trevave tjera.
Ansambli Kombëtar i Këngëve dhe Valleve “Shota” këtë vit ka debutuar me afër 40 paraqitje, në skena të Austrisë, Kroacisë dhe vende tjera të Ballkanit Perëndimor.
