Padyshim që ka qenë projekti më i madh i Baletit Kombëtar të Kosovës. Institucioni ka arritur që për të parën herë të sjellë në Prishtinë një vepër klasike të përmasave të tilla.
Premiera e veprës “Arrëthyesi” ka arritur që të dëshmojë potencialin e balerinëve vendor, bashkëpunimin me Filharmoninë e Kosovës, por edhe nevojën që skena të pasurohet gjithnjë me balerinë të huaj, siç kanë qenë ata nga Tirane e Sofja.
Vepra e krijuar nga kompozitori rus, Çajkovski, është duartrokitur gjatë si shfaqje me dy akte. Shfaqja në vete bart historinë e një vajze të vogël dhe luftës së saj bashkë me arrëthyesin.
Mirëpo pavarësisht se është projekt i madh, “Arrëthyesi” edhe një herë ka nxjerrë në pah problemin disa vjeçar të BKK-së: mungesën e një hapësire. Për shkak të renovimeve të hapësirave improvizuese të institucionit, balerinët janë detyruar që ta mbajnë premierën në një hapësirë private.
“Arrëthyesi” do të luhet edhe sonte me bileta të shitura plotësisht ditë më parë, teksa drejtori i BKK-së, Sinan Kajtazi ka premtuar që kjo vepër do të jetë në repertor çdo dhjetor, si dhuratë për shikuesit në fundvit. /Kosovatimes/
