Presidentja Vjosa Osmani e ka vlerësuar Bullgarinë shtet mik, partner dhe aleat të Kosovës në të gjitha aspektet, derisa tha se pret mbështetjen e këtij shteti edhe drejt anëtarësimit të vendit tonë në NATO dhe BE.
Ajo në konferencën e përbashkët për media me presidentin bullgar, Rumen Radev ka thënë se që nga viti 1999 kur u shënua edhe angazhimi i parë për paqen dhe sigurinë në vendin tonë e deri më tani, Bullgaria ka dhënë kontribut në çdo etapë për ndërtimin e paqes dhe ndërtimit të shtetit të Kosovës.
“Angazhimi në KFOR, njohja e pavarësisë, duke qenë se Bullgaria ka qenë ndër shtetet e para që na ka njohur, përkrahja në Gjykatën Ndërkombëtare të Drejtësisë, përkrahja e anëtarësimit tonë në organizatat ndërkombëtare dhe përkrahja e vazhdueshme për integrimin euroatlantik”, ka theksuar Osmani.
Tutje e para e shtetit ka thënë se Bullgaria këtë përkrahje e rikonfirmoi edhe me votën që i dha Kosovës në fazën e parë për anëtarësim në Këshillin e Evropës, derisa tha se pret mbështetje të tillë edhe në fazat e tjera deri në pranimin e plotë në këtë këshill.
Osmani më tej ritheksoi nevojën e domosdoshme që Kosova të bëjë hapa drejt anëtarësimit në NATO, duke i ditur sfidat e sigurisë nëpër të cilat po kalon kontinenti ynë.
“Vetëm anëtarësimi në NATO i të gjitha shteteve të Ballkanit Perëndimor, të cilat mëtojnë një gjë të tillë, do të mund të ketë efekt afatgjatë për paqe në rajonin tonë”, tha Osmani.
Ajo shprehu shpresën në mbështetjen e fuqishme nga Bullgaria në anëtarësimin e Kosovës në Bashkimin Evropian, derisa tha se pret që anëtarësimi i Kosovës të konsiderohet prioritet edhe nga vet BE-ja, pasi kjo do të krijonte stabilitet në rajon.
“Udhëheqja e guximshme dhe veprimet vendimtare të aleatëve tanë në familjen euroatlantike janë të nevojshme për të përshpejtuar pranimin e bazuar në merita të vendeve demokratike të rajonit edhe në BE edhe në NATO. Sepse çdo hezitim do të krijonte një boshllëk, duke i dhënë mundësi aktorëve keqdashës ta destabilizojnë jo vetëm Kosovën, por edhe rajonin e përtej”, nënvizoi presidentja Osmani.
E para e shtetit tha se Kosova si vend demokratik, si vend 100 përqind i afruar me vendimet e politikës së jashtme të sigurisë së BE-së mbetet e palëkundur në përkushtimin e saj për të kultivuar marrëdhënie të mira fqinjësore me të gjithë.
“Për ne raporti me Bullgarinë gjithmonë ka qenë i një rëndësie të veçantë, prandaj besoj fuqimisht se me përpjekjet tona të përbashkëta do të krijojmë mundësi të reja jo vetëm për të ruajtur paqen në Kosovë por në të gjithë rajonin, si dhe do të hapim kapituj të ri të bashkëpunimit të cilët do ta pasurojnë dhe fuqizojnë gjithnjë e më shumë partneritetin tonë. Ne shohim Bullgarinë si shtet mik, partner dhe si aleat. Prandaj jemi të gatshëm e plot vullnet për zhvillime pozitive në fusha të ndryshme të partneritetit bilateral nga ekonomia, energjia e arsimi, deri te fusha e sigurisë dhe e mbrojtjes”, shtoi Osmani.
