Një dron i lëshuar nga Irani ka goditur një cisternë me lëndë kimike në Oqeanin Indian mëngjesin e së shtunës, tha Departamenti amerikan i Mbrojtjes.
“Anija motorike, CHEM PLUTO, me flamur të Liberisë, në pronësi japoneze dhe e operuar nga Holanda, u godit rreth orës 10:00, sipas kohës lokale, në Oqeanin Indian, 200 milje detare nga brigjet e Indisë, nga një sulm me dron i kryer nga Irani”, tha një zëdhënës i Pentagonit për agjencinë Reuters.
Incidenti vë në pah tensionet e përshkallëzuara rajonale dhe një rrezik të ri për linjat detare pas sulmit të 7 tetorit të Hamasit – grupit palestinez të shpallur organizatë terroriste nga ShBA-ja – ndaj Izraelit, gjë që ka nxitur luftën.
Qeveria iraniane, por edhe forcat militante aleate të saj në Jemen, publikisht kanë kritikuar operacionin ushtarak të Izraelit në Rripin e Gazës. Si pasojë e sulmit fillestar të Hamasit, në Izrael janë vrarë 1.200 persona, ndërkaq nga luftimet në Gazë janë vrarë mbi 20.000 palestinezë.
Nuk është raportuar për viktima si pasojë e sulmit me dron dhe zjarri i shkaktuar në cisternë është shuar menjëherë.
Irani ende nuk ka reaguar për këtë ngjarje.
