Zëdhënësi i AAK-së, Kushtrim Xhemaili, ka thënë se rritja e çmimit të rrymës në këtë kohe krize është edhe një goditje shtesë nga Kurti dhe njerëzit e tij, pikërisht kur pritet largim masiv i të rinjve pas 1 janarit.
Xhemaili, në një postim në Facebook, ka kujtuar anulimin e ndërtimit të termocentralit ‘Kosova C’.
“Vendimin e parë që Kurti e mori si kryeministër ishte anulimi i ndërtimit të Termocentralit Kosova C. Ky vendim pasoi me ndëshkim në vlerë prej 26 milionë për Kosovën nga ana e Arbitrazhit. E sot, Kosova e varfër është edhe e vjedhur nga po të njëjtët njerëz, nga ata që ndikuan në anulimin e projektit të ndërtimit të termocentralit të ri, e që sot e furnizojnë Kosovën me rrymë duke e shitur me një çmim shumëfish më të lartë se sa çmimi real”, ka thënë Xhemaili.
Sipas Xhemailit, ndihmat që i ndanë për fundvit Qevereia, janë shpëlarje parash për KEDS-in, duke e ditur që ato do shkojnë direkt në fatura. Kryeministri, sipas tij, i dhuroi KEDS-it miliona euro për fundvit.
“I bëj thirrje Prokurorisë të fillojë hetim të gjerë rreth këtyre çështjeve. Rritja e çmimit të rrymës në këtë kohe krize është edhe një goditje shtesë nga Kurti dhe njerëzit e tij, pikërisht kur pritet largim masiv i të rinjve pas 1 janarit”, shkruan zëdhënësi i AAK-së, Kushtrim Xhemaili.
