Shpërthime të forta u dëgjuan në pjesë të Rusisë jugperëndimore dhe në gadishullin e Krimesë nën pushtimin rus natën mes të martës dhe të mërkurës.
Zyrtarët rusë thonë se qyteti kufitar i Belgorodit, ku 25 persona u vranë të shtunën, është sulmuar sërish, si dhe Sevastopoli në Krime, ku u rrëzua një raketë ukrainase, raportoi BBC.
Ditët e fundit janë intensifikuar sulmet ajrore në luftën mes Rusisë dhe Ukrainës.
Presidenti ukrainas Volodymyr Zelensky tha se Rusia kishte përdorur rreth 300 raketa dhe 200 dronë në pesë ditë.
Disa shpërthime u raportuan në Belgorod gjatë natës të së mërkurës dhe guvernatori i rajonit tha se disa dronë u shkatërruan.
Në Sevastopol – qyteti më i madh në Krime nën pushtimin e Rusisë – një raketë u rrëzua mbi port, tha në Telegram guvernatori i emëruar nga Moska, Mikhail Razvozhayev.
Të martën, raketat ruse goditën qytetet më të mëdha të Ukrainës, duke përfshirë Kharkivin dhe Kievin, duke vrarë të paktën pesë persona dhe duke plagosur dhjetëra, thanë zyrtarët lokalë. Një person u vra gjithashtu në sulmin ukrainas në Belgorod.
Sulmet erdhën pasi presidenti rus Vladimir Putin u zotua të shtonte sulmet në përgjigje të sulmeve të fundit të Ukrainës në territorin rus.
Në fjalimin e tij të natës të martën, Zelensky tha se Rusia gjuajti “pothuajse njëqind raketa të llojeve të ndryshme” atë ditë me, siç tha ai, “një llogaritje speciale të armikut për të shkaktuar sa më shumë dëme”, raporton RSE .
