Në fillim të qershorit 2022, ish-gjenerali u ndalua në kufirin me Serbinë teksa po përpiqej të largohej për në Maqedoninë e Veriut. Në makinën që ai drejtonte iu gjetën 600 mijë euro para cash, një shumë e pazbuluar në dollarë amerikanë, diamante dhe smeraldi. Me të në makinë ishte edhe një person tjetër. Naumov deklaroi se të paktën një pjesë e parave i takojnë atij.
Në shtator 2023, një gjykatë në Nish e dënoi atë me një vit burg. Ai e apeloi vendimin. Një muaj më vonë, Ukraina kërkoi ekstradimin e tij, ku akuzohet për shpërdorim detyre. Gjykata serbe ia refuzoi këtë Kievit. Mbrojtja e Naumov pretendon se jeta e tij është në rrezik në Ukrainë. Avokatët argumentojnë se kërcënimi vazhdon në Serbi dhe kërkuan që klienti të lejohet të largohet nga vendi, raportoi BBC . Gjykata ia mohoi këtë.
Deri në vitin 2021, Naumov drejtoi Drejtorinë kryesore të Sigurisë së Brendshme të SBU, përgjegjëse për kontrollin mbi oficerët e inteligjencës. Para kësaj, ai ishte kreu i Agjencisë Shtetërore të Ukrainës për Menaxhimin e Zonës së Përjashtimit të Termocentralit Bërthamor të Çernobilit. Ai u largua nga vendi disa orë përpara se të fillonte pushtimi rus në shkallë të gjerë në 2022.
Pastaj ushtria ruse pushtoi centralin bërthamor të Çernobilit pa luftë në më pak se 24 orë, duke udhëhequr një sulm në Kiev nga territori bjellorus. Naumov dyshohej për tradhti të lartë, njoftoi shërbimi ukrainas i Radio Liberty.
Presidenti ukrainas Vladimir Zelensky njoftoi në prill 2022 se i kishte hequr gradën gjeneral brigade për shkelje të betimit ushtarak. Në video-mesazhin e tij të përditshëm për ukrainasit, ai në fakt akuzoi Naumovin për tradhti./Kosovatimes/
