Gjatë 2024-tës është paralajmëruar rënie e normave të interesit në bankat që operojnë në Kosovë. Kështu të paktën ka thënë kryetari i Odës Ekonomike të Kosovës, Lulzim Rafuna në një konferencë të mbajtur për medie, me ç’rast ka shtuar se nuk parashihet as rritje e inflacionit për sivjet.
“Pritjet tona janë që gjatë vitit 2024 nuk do të ketë rritje të normave të interesit dhe inflacionit. Këtë vit pritet të ketë stabilitet dhe fillim të rënies së normave të interesit në bankave”, tha Rafuna.
Rafuna ka folur edhe për sfidat me të cilat janë përballur bizneset gjatë vitit të kaluar, me ç’rast ka shtuar se bizneset kanë ngritur shqetësime për largim të stafit me heqjen e vizave.
“Sipas përgjigjeve që kemi marrë nga 500 kompani del që gjatë vitit 2023 ka pasur një mungesë të porosive apo të themë kërkesës sa i përket shitjes së banesave. 53 për qind e të anketuarve kanë thënë se ka mungesë të kërkesave. 70 për qind e bizneseve kanë thënë se kanë mungesë të stafit të kualifikuar, 32 për qind kanë thënë se kanë pasur kapacitete teknike të vogla, 66 për qind kanë pasur mungesë të mjeteve financiare”, tha ai.
Tutje i pari i Odës Ekonomike foli për aktivitetet që kanë organizuar gjatë 2023-tës për bizneset.
“Oda Ekonomike do të vazhdojë të ju gjejë partnerë dhe treg bizneseve të Kosovës. Duke e ditur që bizneset kanë shtuar aktivitetin e tyre, është rritur nevoja për trajnime andaj janë trajnuar dy mijë kandidatë nga Oda Ekonomike. Po ashtu u kemi mundësuar bizneseve që produktet e tyre t’i prezantojnë në panaire në Kosovë dhe jashtë Kosovës. Kanë qenë katër panaire ndërkombëtare ku kanë marrë pjesë. Janë një varg aktivitetesh që janë bërë në Odën Ekonomike”, shtoi ai.
Rafuna tha se do të ndihmojnë bizneset po ashtu në tranzicionin në ekonominë e gjelbër.
