Kryetari i Lidhjes Demokratike të Kosovës, Lumir Abdixhiku, ka deklaruar se Qeveria Kurti ka dështuar në tri vjet qeverisje, duke thënë se në këtë periudhë s`ka pasur projekte madhore, arritje kapitale e as forcim të shtetësisë.
Kreu i LDK-së ka shkruar në Facebook se Qeveria po mburret me njohje pasaportash, mirëpo s’ka pasur asnjë njohje në tri vjetët e fundit.
“Njohja e fundit ishte nga Izraeli, 3 vite më parë; pa ta! Asnjë njohje, asnjë anëtarësim! Sanksione e mbi 300 milion euro humbje nga ky izolim! Mburren me mbledhjen e faturave në veri nga ‘ELEKTROSEVERI’, kompani në pronësi të shtetit të Serbisë. Ka mbi 7 vite që kanë kundërshtuar këtë marrëveshje madje dhe me protestë. Sot marrëveshjen e njëjtë e trumpetojnë si histori”, ka shkruar Abdixhiku.
http://199.192.21.43/2024/01/07/kurti-numeron-te-arriturat-ne-javen-e-pare-te-vitit-fillime-te-reja-per-shtetin-tone/
Sipas tij, Qeveria po mburret edhe me liberalizim, që sipas Abdixhikut, Lëvizja Vetëvendosje e kishte ndërprerë “me dhunë qysh në vitin 2016”.
“Asokohe, Kosova, Ukraina dhe Gjeorgjia ishin në një paketë. 7 vite të humbura për një kauzë që e kanë harruar tashmë. I thonë demarkacion. Këto 3 vite janë të humbura në plotni. Pa projekte madhore, pa arritje kapitale, pa forcim të shtetësisë ndërkombëtarisht”, ka shkruar ai, duke theksuar se “Kosova meriton shumë më mirë”. /Kosovatimes/
