Policia e Kosovës ka përfunduar planin disa mujor të antidrogës, të quajtur “Golfi”, që ka rezultuar me arrestimin e dy të dyshuarve.
Policia me këtë rast ka arritur që të sekuestroj mbi 24 paketime dhe dhjetëra qese me substanca narkotike të llojeve të ndryshme, armë zjarri, para të gatshme e telefona të ndryshëm.
“Fillimisht në rrugën ‘Ernest Koliqi’ në Prishtinë është ndaluar vetura e tipit BMW, ngjyrë e bardhë me targa vendore, të cilën e drejtonte i dyshuari kryesor me iniciale Y.A. ku gjatë kontrollit të tij në trup i janë gjetur para të gatshme, 1100 euro dhe tre telefona Iphone”, thuhet në raportin e policisë.
Policia tutje ka vazhduar bastisjen edhe në shtëpinë e të dyshuarit në rrugën “Jeronim De Rada”, me ç’rast ka hasur në identifikim të një të dyshuari tjetër të përfshirë në shitblerje të substancave narkotike.
“Me të hyrë brenda oborrit një tjetër i dyshuar me iniciale F.H. ka filluar të ik nga vendi i ngjarjes dhe ka hedhur në oborrin e shtëpisë së fqiut një qese të mbushur me substancë të dyshuar narkotike e cila më vonë pas matjes ka rezultuar me peshë 266.8 gram. Hetuesit e antidrogës pas disa metrave ndjekje kanë arrit që ta ndalojnë dhe arrestojnë të dyshuarin e lartcekur me iniciale F.H., ku gjatë kontrollit të tij është gjet një Sprej me mbishkrim ‘NATO’ dhe një telefon Iphone dhe 120 euro para”, vazhdon njoftimi.
Në kuadër të këtij operacioni është kontrolluar edhe një banesë në rr. “Bedri Berisha” në Prishtinë, por nuk është gjetur diçka e dyshuar. /Kosovatimes/
