Kryetari i Aleancës për Ardhmërinë e Kosovës (AAK), Ramush Haradinaj, me rastin e 25-vjetorit të Masakrës së Reçakut, ka thënë se ajo masakër ishte një akt çnjerëzor tronditi mbarë botën demokratike. Haradinaj ka thënë se Kosova duhet të jap kontributin e saj, duke qenë në rresht si anëtare e NATO-s e udhëhequr nga ShBA-të.
“Para 25 vitesh, një akt çnjerëzor tronditi mbarë botën demokratike dhe shtyri Perëndimin të mobilizohej dhe të ndalojë me forcë shfarosjen e një populli të tërë. Masakra e Reçakut, mbetet simboli i krimit gjenocidal që aparatura shtetërore ushtarake serbe kreu në Kosovë. Ajo bëri kthesën e madhe historike duke prekur thellë në ndërgjegjen e kombeve të fuqishme për të lëvizur me NATO-n në krye me ShBA-të”, ka thënë Haradinaj.
Ai ka shtuar se ata që u flijuan u bënë themel i lirisë së Kosovës.
Mirënjohës përjetë, siç tha ai, ambasadorit amerikan, William Walker, që e përkufizoi këtë masakër si krim kundër njerëzimit.
“Në të njëjtën kohë, falënderojmë Amerikën e cila ishte krah nesh në të gjitha periudhat historike. Në këtë përvjetor të masakrës së Reçakut, theksohet nevoja për stabilitet dhe më shumë paqe në rajon e botë. Kosova është e gatshme të japë kontributin e saj duke qenë në rresht si anëtare e NATO-s së udhëhequr nga miqtë tanë, ShBA-të”, ka përfunduar Haradinaj pas homazheve në Reçak.
