Inspektorati Qendror i Punës i ka shqiptuar dënim Kompanisë komunale “Gjelbër” ish “Hortikultura”, me rastin e inspektimit të kësaj ndërmarrjeje pas ankesës së palës ankuese Valon Selimi për shkak të cenimit të dispozitave të udhëzimit administrativ për rregullimin e procedurave të Konkursit në sektorin publik në shumë prej 1.000 euro.
Sipas shkresave kjo ndërmarrje përmes konkursit publik, kishte kërkuar rekrutimin e një veterineri për nevoja të strehimores së kryeqytetit në Hajvali, por siç duket, qysh në nisje ishte konkurs i parapërgatitur.
Përveç komisionit që nuk ishte i nivelit të konkurruesve, komisioni nuk ka mbajtur procesverbal dhe notim, për çka inspektorati i punës ka evidentuar shkelje duke kërkuar përsëritjen e konkursit dhe marrjen parasysh të këtyre gjetjeve brenda tre ditësh, përndryshe do gjobitet me 1 mijë euro gjobë dhe do të përsërit konkursin në fjalë. Siç duket, kjo zgjodhi të dytën! Këtë e dëshmojnë dokumentet e sigurta nga Kosovtimes.
“Komisioni duke mos mbajtur shënime gjatë intervistimit të kandidatëve, respektivisht duke mos shënuar përgjigjet e kandidatëve dhe pyetjet në formularë ka vepruar në kundërshtim me nenin 11 paragrafi 8 të Udhëzimit Administrativ nr. 07/2017 për rregullimin e procedurave të konkursit në sektorin Publik”, thuhet në vendim.
Gjithashtu thuhet se Punëdhënësi nuk ka ofruar dëshmi për eliminim e parregullsive, por ka dhënë vërejtjet ndaj konstatimeve të dala nga raporti zyrtar.
Ndryshe, në këtë konkurs është pranuar kandidati i cili në testin me shkrim kishte tetë (8) pikë më pak se kandidati i parë. /Kosovatimes/
