Nga 22 janari 2024, hyn në fuqi rregullorja për organizimin dhe shfrytëzimin e parkingjeve në kryeqytet.
Kryeshefi i Ndërmarrjes Publike Lokale “Prishtina Parking”, Sokol Havolli tha për RTK-në se në këtë rregullore është punuar gjatë, por se esenca e ndryshimit të rregullores dhe rolit të ndërmarrjes është që gradualisht të përmirësohen të gjitha pakënaqësitë eventuale që mundet me i pas qytetarët, dhe të kontribuohet që çështja e parkimit në kryeqytet të ketë një rregull.
“Është çështje e vështirë sepse të gjitha qytetet e mëdha, kryeqytetet e shteteve të ndryshme gjithmonë ballafaqohen me probleme të parkimit sepse kërkesa është e madhe, hapësirat janë të vogla , mirëpo esenca ka qenë që t’i bëjmë do përmirësime të cilat kishin me qenë më të favorshme për banorët rezident”, tha Havolli.
Ai shtoi se po ashtu prioritet i rregullores së re është çështja e parkimit për banorët rezident, “të jetë sa më mirë e rregulluar dhe sa më pak probleme të kenë banorët rezident”, tha ai.
Sipas tij, si rezultat i kësaj çështje janë bërë disa ndryshime esenciale në rregullore duke eliminuar pagesën për veturën e parë për banorët rezident.
