Gjykata e Lartë në Itali vendosi se përshëndetja fashiste nuk është në kundërshtim me ligjin e republikës, përveç nëse kërcënon rendin publik ose mund të lidhet me ringjalljen e një partie fashiste të ndaluar në Itali.
Disa figura nga partitë e opozitës italiane dhe udhëheqës të komunitetit hebre në Itali kritikuan vendimin e gjykatës dhe po përgatisin protesta, raportuan CNN dhe media të tjera perëndimore , duke cituar mediat italiane.Vendimi i Gjykatës së Lartë vjen dy javë pasi u shfaqën pamjet video të 1500 burrave të rreshtuar me krahët e tyre të ngritura në një përshëndetje fashiste. Ky aksion u filmua në qendër të Romës në kujtim të vrasjes më 7 janar 1978 të dy të rinjve, anëtarë të një grupi të të rinjve radikal të djathtë.
Vendimi i gjyqtarëve të enjten, 18 janar, nuk ka asnjë lidhje me demonstratën e fundit të 7 janarit, e cila u zhvillua para selisë së partisë neofashiste Lëvizja Sociale Italiane. Kryeministrja italiane Giorgia Meloni filloi karrierën e saj politike në këtë godinë. Në lidhje me këtë protestë nuk ka asnjë të arrestuar, por policia po heton rrethanat e aksionit./kosovatimes
