Për të stimuluar lindjet brenda komunës dhe për të rritur sa më shumë shërbimin ndaj nënave që lindin në komunën e Rahovecit, kryetari i kësaj komune ka marrë vendim që për çdo nënë që lind në QKMF t`i shpërblejë me nga 500 euro.
Si në gjithë vendin edhe në këtë komunë vërehet dukshëm rënia e natalitetit, pasi nga 12 lindje në ditë sa kishte kohë më parë, gjatë tërë vitit 2023 u regjistruan vetëm 18 sosh, raporton RTKlive.
Pranvera Mullabazi po i merr shërbimet shëndetësore në repartin e gjinekologjisë në QKMF-në e Rahovecit. Ajo është në pritje të fëmijës së saj të katërt. Fëmijën e dytë e ka lindur këtu, nën kujdesin e stafit mjekësor dhe është ndarë e kënaqur.
“Për të lindur këtu janë kushtet shumë të mira, djalin e dytë këtu e kam lindur para katër vjetëve, kam kaluar shumë mirë. Mikpritja është shumë e mirë e motrave, të presin ngrohtë të këqyrin, shpresoj që kam me lind në Rahovec, kam dëshirë”, tha ajo.
“Shërbimi shumë i mirë, sjelljet shumë të mira, pastërtia dhe krejt mirë”, tha Esma Mullabazi, familjare e pacientes
Nënat shtatzëna nga ekipet mobile kontrollohen edhe në shtëpi, thotë koordinatorja e këtij reparti Alma Kryeziu, ndërsa pacientet nuk kanë nevojë të blejnë ilaçe.
“Kujdesi ndaj nënës është shumë i madh, është e mbuluar me medikamente, nënat shtatzëna i kanë dy vizita, në tremujorin e parë dhe të fundit në shtëpi, a vizitat, ndërkaq vizitat e rregullta me gjinekologun i kanë sistematike”, tha Alma Kryeziu, koordinatore e repartit të gjinekologjisë.
Kurse Makfire Shtavica, e cila është mamia më e vjetër në këtë repart, thotë se në Rahovec ka pasur shumë lindje disa vite më parë, por tani, si në gjithë Kosovën edhe këtu, ka rënë nataliteti.
“Ka pas deri në 12 lindje në ditë, nga 12 deri në 15 bebe i kemi pas në boks, kemi pas edhe lindje më të komplikuara, por janë kryer prapë me sukses”, tha Makfire Shtavica, mami.
Ditët e fundit kryetari i komunës së Rahovecit Smajl Latifi, u ka premtuar nënave që lindin në Rahovec nga 500 euro, por këtë përfitim nuk mund ta kenë ato të tjerat që kanë lindje të komplikuar dhe duhet të lindin në spitalet rajonale apo në Prishtinë.
“Nëse ne jemi dakord me Ministrinë e Financave, dhe na lejojnë që ne t’i kalojmë tavanet ekzistuese, ta rrisim fondin për ndihma momentale të drejtorisë për shëndetësi dhe përkujdesje sociale, me gjithë dëshirë e kishim realizuar ose financuar çdo lindje të rahocianeve”, tha Smajl Latifi, kryetar i komunës së Rahovecit
Në Gjinekologjinë e Rahovecit në vitin 2023 lindën vetëm 18 foshnja, numër i vogël krahasuar me lindjet e mëparshme që ka pasur ky repart.
