Kryeministri Albin Kurti nga konferenca e Samitit në Shkup ka deklaruar se nuk është i lehtë procesi i normalizimit të marrëdhënieve me Serbinë, duke pasur parasysh që shteti fqinj nuk ka vullnet për këtë.
“Duhet të ndahet procesi i anëtarësimit të Kosovës në BE me procesin e normalizimit. Nuk është e lehtë t’i normalizojmë raportet me dikë sepse dihet se Serbia nuk ka as vullnet as për këtë e as Perëndimin”, ka thënë ai.
Kurti ka folur edhe për ndërlidhjen mes Samitit në Shkup dhe idesë së Ballkanit të hapur.
“Kjo nuk ka të bëjë me ‘Ballkanin e hapur’ sepse është BE. ‘Ballkani i hapur’ nuk është mjaftueshëm evropian ndërsa Evropa e hapur është e mjaftueshme për Ballkanin. ‘Ballkani i Hapur’ nuk i ka rregullat dhe financimin e BE-së”, ka deklaruar Kurti, transmeton RTKlive.
Ndërkaq për ndërrimin e konferencës nga e përbashkët te dalja e çdo kryeministri veç e veç, ai ka thënë se organizatorët duhet të përgjigjen.
“Nuk jam ne dijeni pse nuk ishte e përbashkët. Me të përfunduar takimi u njoftuam që secili burrështetas do të paraqiste para gazetarëve të veçantë. Do te duhej organizatorët të tregonin”, ka thënë ai.
Kurti: Nuk tërheqim masat e sigurisë ndaj Serbisë, sa ka grupe paramilitare
Në deklarimin për media pas konferencës së Samitit të Shkupit, kryeministri Albin Kurti ka folur edhe për masat ndaj Serbisë, duke thënë se ato nuk janë tregtare por janë masa të sigurisë.
“Ne nuk kemi masa tregtare ndaj Serbisë, kemi masa të sigurisë. Në vitin 2023 tri herë kemi pasur sekuestrime në veri të Kosovës”, ka deklaruar Kurti.
Tutje ai ka thënë se nuk do të ndodh heqja e masave të sigurisë përderisa ka grupe paramilitare.
“I gjithë ky armatim është prodhuar ne Serbi dhe ka ardhur nga Serbia. Për shkak të kontrollave të shtuara, ka mundësi që ndërmarrjet e caktuara nuk janë të interesuara të kalojnë kufirin në Kosovë sikurse dikur. Masat e sigurisë nuk jemi të gatshëm t’i tërheqim derisa kemi grupe paramilitare”, ka deklaruar ai, transmeton RTKlive.
Kurti: Plani rrit shpejtësinë e reformave mes Kosovës dhe BE-së
Kryeministri Albin Kurti, gjatë deklarimit për media pas konferencës së Samitit në Shkup, ka thënë se plani i rritjes synon përfitimin nga tregu i lirë para anëtarësimit në BE.
“Plani i rritjes synon të na ofrojë për të përfituar nga tregu unik para anëtarësimit. Plani e rrit shpejtësinë e reformave dhe konvergjencës mes Kosovës dhe BE-së”, ka thënë Kurti, transmeton RTKlive.
Tutje ai ka deklaruar se plani i rritjes mund të shtojë 10 përqind vlerën e produktit bruto.
“Me nivelin aktual të rritjes ekonomike, produkti bruto qëndron ndërmjet 30 përqind dhe 50 përqind të mesatares së BE-së. Plani i rritjes së BE-së mund ta shtojë edhe 10 përqind”, tha ai.
