Në Pakistan, ku afërsisht 40 për qind e 240 milionë njerëzve janë analfabetë, simbolet elektorale luajnë një rol vendimtar për të siguruar pjesëmarrjen e qytetarëve me të drejtë vote në procesin demokratik.
Simbolet elektorale vazhdojnë të luajnë një rol të rëndësishëm për t’u siguruar që të dëgjohet zëri i votuesit në procese demokratike.
Pakistani do të mbajë zgjedhjet e reja më 8 shkurt. Për t’u siguruar që çdo qytetar me të drejtë vote të mund të marrë pjesë në procesin politik, çdo partie politike i caktohet një simbol unik që shfaqet pranë emrit të partisë.
Sistemi është krijuar për t’u siguruar që individët me aftësi të kufizuara në shkrim-lexim, të mund të marrin pjesë me votën e tyre në proces.
Gjithsej 147 simbole që përfaqësojnë kafshë, objekte të pajetë, lule dhe madje edhe avionë luftarakë, janë regjistruar përkrah emrave të partive në të gjithë vendin.
Gjykata e Lartë e Pakistanit më 13 janar ia ndaloi PTI-së të përdorë simbolin e saj tradicional elektoral në pengesën më të fundit të vendosur ndaj liderit të burgosur Imran Khan, para zgjedhjeve të përgjithshme.
Lista përfundimtare e kandidatëve do të publikohet nga Komisioni Zgjedhor i Pakistanit më 23 janar.
Tashmë janë pranuar dokumentet e nominimit për rreth 23.000 kandidatë që garojnë për asamble kombëtare dhe lokale.
Me afrimin e datës së zgjedhjeve, shtypshkronjat në të gjithë Pakistanin po punojnë pa u ndalur për të përmbushur kërkesën për posterë, fletushka dhe produkte tjera për fushatë.
