Ushtruesi i Detyrës së Kryeprokurorit të Shtetit, z. Besim Kelmendi, i shoqëruar nga Drejtori i Përgjithshëm i Sekretariatit të Këshillit Prokurorial të Kosovës, z. Sami Istrefi, dhe Udhëheqësi i Departamentit të Teknologjisë Informative në Sekretariatin e Këshillit Prokurorial të Kosovës, z. Nexhat Haziri, ka pritur në takim një delegacion të Prokurorisë së Përgjithshme të Republikës së Shqipërisë, të kryesuar nga Kreu i Prokurorisë së Apelit, z. Genti Xholi.
Temë qendrore e diskutimeve të përbashkëta ishte shkëmbimi i përvojave dhe praktikave profesionale lidhur me sistemin e menaxhimit të lëndëve penale.
Përfaqësuesit e Prokurorisë së Përgjithshme patën mundësinë që gjatë kësaj vizite studimore të shohin nga afër zhvillimin, funksionalizimin dhe aplikimin e Sistemit për Menaxhimin Informativ të Lëndëve (SMIL) nga ana e institucionit të Prokurorit të Shtetit, në mënyrë që një sistem të ngjashëm të mund ta zhvillojnë dhe aplikojnë edhe në institucionin e tyre.
Në këtë drejtim, U.D. Kryeprokurori i Shtetit, z. Besim Kelmendi, ka shprehur gatishmërinë e tij dhe sistemit prokurorial që të bashkëpunoj ngushtë me Prokurorinë e Përgjithshme të Republikës së Shqipërisë në shkëmbimin e eksperiencave dhe praktikave më të mira që kanë të bëjnë me zhvillimin e sistemit për menaxhimin e lëndëve penale. /Kosovatimes/
