Naim Murseli, i dyshuari për planifikim të vrasjes së gruas së tij, Liridona Ademaj, është intervistuar sot nga organet e drejtësisë. Nga Prokuroria Themelore thanë për RTK-në se në këtë rast nuk mund të japin informacione për shkak të ndjeshmërisë së hetimeve. Derisa ka folur avokatja e tij.
I dyshuari për planifikim të vrasjes së Liridona Ademajt, bashkëshorti i saj, Naim Murseli, është intervistuar të mërkurën nga Prokuroria Themelore, përkatësisht Departamenti për Krime të Rënda.
Nga Prokuroria thanë për RTK-në se për shkak të hetimeve nuk mund të japin detaje.
“Kjo çështje penale ndodhet në proces hetimor, andaj në këtë fazë nuk mund të japim informata të detajuara, deri në një fazë tjetër”, ka theksuar për RTK, Laureta Ulaj zëdhënëse në Prokurorinë Themelore.
Ndërkaq, avokatja që përfaqëson Naim Murselin, Teuta Zhinipotoku, në një përgjigje me shkrim për RTK njoftoi se nga organet e drejtësisë, Murseli është dëgjuar në cilësinë e të pandehurit, dhe se dyshimi i bazuar është i orientuar në drejtim të veprës penale: Vrasje e Rëndë në bashkëkryerje.
“I pandehuri ka rrëfyer versionin e vet të mbrojtjes dhe mbrojtja e tij lidhur me ngjarjen është tërësisht ndryshe nga ajo që është publikuar në rrjetet e informimit dhe ato sociale. Me qenë se sit është ndërprerë deklarimi I të pandehurit për shkak të mbarimit të orarit dhe deklarimi I tij nuk ka arritur të përfundojë është caktuar një datë tjetër për vazhdimin e marrjes në pyetje të të pandehurit”, ka theksuar ajo.
Në pyetje nga organet e drejtësisë të mërkurën u mor edhe Kushtrim Kokalla, po ashtu i dyshuar për të njëjtin rast.
