Trajneri i Liverpoolit, Jurgen Klopp, ka thënë së është i lumtur që skuadra e tij është në finalen e Kupës së Ligës angleze.
“The Reds” mbrëmë luajtën baras 1-1 me Fulhamin, por Liverpool falë fitores në ndeshjen e parë (2-1), ka siguruar finalen e kësaj gare interesante në tokën angleze.
Klopp thotë se të besuarit e tij, treguan forcën dhe karakterin për fitore ndaj Fulhamit.
Strategu gjerman pohon se finalja ndaj Chelsea-s do të jetë një ndeshje e madhe.
“Skuadra tregoi forcën e karakterit dhe dëshirën për të prekur finalen. Ndihem shumë mirë pas kësaj sfide, të gjithë jemi të lumtur, mezi po e presim ndeshjen finale në ‘Wembley’”, ka thënë Klopp.
“Në finale përballë Chelsea-t? Do të jetë një ndeshje e madhe. Është një takim midis dy skuadrave që e kërkuan këtë finale dhe do të jetë një ndeshje e bukur”, ka theksuar Klopp.
Finalja mes Chelsea-s dhe Liverpoolit do të luhet më 25 shkurt në ‘Wembley’.
