Një studim i kryer gjatë viteve të fundit nga Kisha Ungjillore e Gjermanisë (EKD) dhe organizata bamirëse anëtare e saj Diakonie Deutschland ka identifikuar të paktën 2,225 viktima të dhunës dhe abuzimit, si dhe 1,259 autorë të dyshuar, raportoi Deutsche Welle .
Kjo është vetëm “maja e ajsbergut”, tha Martin Watzlawick, kreu i grupit kërkimor në Universitetin e Hanoverit. Viktimat po bëjnë thirrje për hetime të mëtejshme për shkeljet.
Shteti duhet të marrë përgjegjësinë për hetimin e krimeve, pasi kisha nuk ka as kompetencën e nevojshme dhe as interes të mjaftueshëm për t’i zgjidhur ato. Ndryshe, sipas përfaqësueses së viktimave, Katharina Kracht, krimet do të mbeten të pazbardhura.
Nisma për kryerjen e një studimi të tillë është nisur në vitin 2020 nga vetë Kisha Ungjillore e Gjermanisë. Ajo ndau tre milionë e gjysmë euro për të studiuar aktivitetet e strukturave të kishës që mund të nxisin dhunën dhe abuzimin.
Kryetarja e bordit të EKD-së, Kirsten Fehrs u kërkoi falje “nga thellësia e zemrës së saj” për ata që u prekën nga dhuna seksuale dhe abuzimi kur u publikua studimi. Ajo pranoi se Kisha Ungjillore ishte fajtore për dëmtimin e shumë njerëzve dhe tha se ishte “e tronditur deri në palcë” nga situata e përshkruar në raport.
Një studim i abuzimit seksual në Kishën Katolike Gjermane, rezultatet e të cilit u publikuan në vitin 2018, shqyrtoi dosjet personale të pothuajse 40 mijë njerëzve nga viti 1945 deri në 2014. U zbulua se 1670 priftërinj mund të përfshiheshin në krime të tilla. Rreth 3700 fëmijë dhe adoleshentë u prekën. Autorët e studimit këmbëngulin se këto janë shifra të nënvlerësuara. Pas zbulimit të fakteve skandaloze në Kishën Katolike, shumë famullitarë filluan të largoheshin nga ajo, transmeton Deutsche Welle.
