Prej datës 1 shkurt, euro do të jetë valutë e vetme për operacionet me para të gatshme në Republikën e Kosovës. Kjo është e paraparë edhe me Kushtetutën e Kosovës, por është shtyrë deri tani për arsye politike, thotë eksperti i çështjeve bankare, Flamur Keqa. Ai thekson se përdorimi i euros do të jetë të favor edhe të minoritetit serb në Kosovë, për shkak se dinari ka pasur devalvim rreth 35 për qind gjatë tri viteve të fundit.
Përdorimi i një valute të vetme në Kosovë si mjet pagese, është përcaktuar me nenin 11 të Kushtetutës së Kosovës. Në të bazohet edhe rregullorja e Bankës Qendrore, që pritet të fillojë të zbatohet nga data 1 shkurt, sipas së cilës euro do të jetë valutë e vetme për transaksione me para të gatshme.
Eksperti i çështjeve bankare, Flamur Keqa, në një intervistë për Radio Kosovën thotë se arsyet pse nuk është zbatuar deri tani neni 11 i Kushtetutës janë të ndryshme, një pjesë e tyre lidhen me fushën politike, e cila ka ndikuar në disa veprime të institucioneve të Kosovës.
“Për këtë mos zbatim apo shkelje të Kushtetutës, mund t’i fajësoj pjesërisht institucionet politike, po ashtu edhe institucionet shtetërore të cilat kanë qenë të cilat kanë qenë të ngarkuara me licencimin, mbikëqyrjen adoptimin e rregullativës që e rregullon këtë fushë”, thotë Keqa.
Keqa shfaq bindjen se institucionet e Kosovës janë konsultuar me institucionet ndërkombëtare sa i përket zbatimit të rregullores që ndalon përdorimin e dinarit si mjet pagese dhe e vlerëson BQK-në si institucion përgjegjës për vendosjen e rregullit në tregun financiar në Kosovë. Ai, madje, thekson se edhe vetë serbët do të kenë përfitime nga përdorimi i euros.
“Unë besoj dhe ju bëj thirrje popullatës serbe në pjesën e veriut dhe kudo që janë, që veprojnë e jetojnë në Republikën e Kosovës, që ta pranojnë me shumë gjentilesë, sepse duhet ta dinë që dinari serb këtyre 3 viteve të fundit ka pasur devalvim të lartë, respektivisht inflacioni në Serbi prej vitit 2021 deri në vitin 2023 ka qenë 35 për qind, që është më i larti në Evropë”, theksoi Keqa.
Ndryshe, guvernatori i Bankës Qendrore të Kosovës, Ahmet Ismaili, ka sqaruar se BQK është e pavarur në vendimet e saj dhe se ato nuk e cenojnë asnjë qytetar të Kosovës.
