Kryetari i Aleancës për Ardhmërinë e Kosovës (AAK), Ramush Haradinaj, ka uruar kreun e BDI-së, Ali Ahmeti, për zgjedhjen e Talat Xhaferit si kryeministër i parë shqiptar i Maqedonisë së Veriut.
Përmes një komunikate për medie bëhet e ditur se Haradinaj ka uruar zgjedhjen e Xhaferit për kryeministër të Maqedonisë së Veriut, duke e konsideruar këtë ngjarje si “fillimvit të mbarë për shqiptarët”.
“Një fillimvit i mbarë për shqiptarët e Maqedonisë së Veriut, për vet shtetin dhe mbarë rajonin”, ka thënë Haradinaj.
Haradinaj tutje ka thënë se zgjedhja e Xhaferit kryeministër, përbën lajmin më të mirë për të ardhmen e shqiptarëve në Maqedoninë e Veriut.
“Zgjedhja e Talat Xhaferit, si kryeministër i parë shqiptar në Maqedoninë Veriore përbën lajmin më të mirë për të ardhmen e shqiptarëve atje dhe për shtetin tonë fqinj”, është shprehur Haradinaj.
Duke e uruar Xhaferin për postin e kryeministrit, Haradinaj ka thënë se e ardhmja e përbashkët e dy vendeve është në BE dhe NATO.
“Mikut tim Talat Xhaferi, sikurse kreut të BDI-së, Ali Ahmeti, i uroj përzemërsisht për këtë të arritur historike, duke qenë të bindur se e ardhmja jonë e përbashkët është në Bashkimin Evropian, në NATO dhe mekanizma tjerë të rëndësishëm ndërkombëtar”, ka përfunduar Haradinaj. /Kosovatimes/
