Grupi palestinez Hamas, i cilësuar si një grup terrorist nga SHBA dhe BE, tha se do të diskutonte çdo marrëveshje me Izraelin vetëm pas një armëpushimi “të plotë dhe gjithëpërfshirës”, në vend të një armëpushimi të përkohshëm. Këtë e raporton Times of Israel .
Pasi të ndalojnë luftimet, “detajet e mbetura mund të diskutohen”, duke përfshirë lirimin e pengjeve, tha zëdhënësi i Hamasit Taher al-Nunu për AFP.
Izraeli refuzon kërkesa të tilla nga Hamasi.
Më herët, në negociatat në Paris, përfaqësuesit e Izraelit, Shteteve të Bashkuara, si dhe Egjiptit dhe Katarit, të cilët mbajnë kontakte me udhëheqjen e Hamasit, ranë dakord mbi bazën e një marrëveshjeje të re.
Sipas planit të propozuar, operacionet ushtarake nga Forcat e Mbrojtjes së Izraelit (IDF) në Rripin e Gazës duhet të ndalen përkohësisht. Izraeli gjithashtu duhet të lehtësojë dërgimin e ndihmave humanitare për civilët në Rripin e Gazës dhe të lirojë një numër të burgosurish palestinezë nga burgu. Hamasi, nga ana e tij, duhet të lirojë gradualisht pengjet e kapur si rezultat i sulmit militant ndaj Izraelit më 7 tetor të vitit të kaluar. Paralelisht do të zhvillohen negociatat për një armëpushim të përhershëm, i cili do të sigurohet ndër të tjera nga bashkësia ndërkombëtare.
Sulmi i militantëve të Hamasit dhe Xhihadit Islamik në Izraelin jugor më 7 tetor 2023 vrau rreth 1200 njerëz, kryesisht civilë. 240 u morën peng dhe u dërguan në Rripin e Gazës. Raportohet se 27 prej tyre kanë vdekur në robëri. Si kundërpërgjigje, Izraeli nisi një operacion ushtarak në Rripin e Gazës me qëllim të shkatërrimit të plotë të Hamasit. Sipas palës palestineze, më shumë se 26 mijë banorë të sektorit u vranë si rezultat i ofensivës izraelite.
Nëntorin e kaluar, Izraeli dhe Hamasi ranë dakord për një armëpushim të shkurtër. Më pas, në këmbim të rifillimit të furnizimeve me ndihma humanitare për Rripin e Gazës dhe lirimit të një numri të burgosurish palestinezë nga burgjet izraelite, u kthyen rreth 130 pengje, izraelitë dhe të huaj. Megjithatë, negociatat e mëtejshme ngecën për shkak të kërkesave të Hamasit, të cilat Izraeli i konsideroi të pamundura për t’u përmbushur.
