Kryeministri i Republikës së Kosovës, Albin Kurti, bashkë me kryetarin e Kuvendit të Kosovës, Glauk Konjufca, priti sot krerët politikë shqiptarë të opozitës nga Maqedonia e Veriut.
Në takim ishin Arben Taravari, kryetar i Aleancës për Shqiptarët (ASh) dhe i Komunës së Gostivarit, si dhe udhëheqësit e Lidhjes Evropiane për Ndryshim (LEN), Bilall Kasami, kryetar i Lëvizjes Besa i Komunës së Tetovës, Izet Mexhiti, kryetar i Lëvizjes Demokratike dhe deputet, dhe Afrim Gashi, kryetar i Alternativës, po ashtu deputet.
Izet Mexhiti kryetar i Lëvizjes Demokratike në një intervistë për lajmet qendrore të RTK-së ka folur rreth këtij takimi, derisa ka konfirmuar pjesëmarrjen e Lëvizjes Vetëvendosje në zgjedhjet parlamentare më 8 maj, përmes përfshirjes në listën opozitare Lidhja Evropiane.
“Sa i përket Lëvizjes Vetëvendosje ajo nuk është e regjistruar si subjekt në Maqedoninë e Veriut dhe de jure nuk funksionon, por ne do të kemi listë të përbashkët të deputetëve në kuadër të Lidhjes Evropiane”, ka theksuar Mexhiti.
Sipas tij, pjesa dërrmuese e shqiptarëve në Maqedoninë e Veriut janë të pakënaqur nga qeverisja e subjektit që është mbi 20 vjet në qeveri, por se tani ka një zë unifikues të opozitës shqiptare.
“Ka munguar konsolidimi dhe unifikimi i opozitës. Tanimë ka një opozitë që përbëhet nga këto katër subjekte politike. Jemi në takime intensive, sot ishte me ne edhe Arben Taravari, kryetar i Aleancës për Shqiptarët, që edhe ky subjekt t’i bashkohet listës për ta sjellë ndryshimin e shumëpritur për shqiptarët në Maqedoninë e Veriut. Vetëvendosja është pjesë e Lidhjes Evropiane për ndryshim. Ne po punojmë në platformën për zgjedhjet e ardhshme parlamentare, ku marrin pjesë edhe ekspertë nga Vetëvendosja, si Arbër Zajmi, Elvis Hoxha e Bekim Qoku. Tashmë jemi të sinkronizuar për ndërtimin e platformës, për ndërtimin e listave dhe fushatën e përbashkët”, ka shtuar Mexhiti.
Sa i përket mungesës së opozitës në seancën ku u votua si kryeministër Talat Xhaferi, ai theksoi se ata janë duke e bojkotuar parlamentin që një muaj pasi kryeparlamentari i deritashëm, Talat Xhaferi e pamundësoi përfshirjen e opozitës shqiptare në Komisionin Zgjedhor. Ai ka thënë se kryeministri teknik nuk ka rol në vendimmarrje politike.
“Bëhet fjalë për kryeministër teknik. E kryeministër teknik shqiptar ka pasur edhe në vitin 2001 – Qemajl Musliu. Por, tash në mënyrë pompoze po duan ta shesin se është hera e parë që zgjidhet një shqiptar. Edhe unë kam qenë pjesë e BDI-së dhe elektoratit i kemi premtuar kryeministër politik dhe atë me emër e mbiemër, Naser Zyberi dhe tash bëhet Talat Xhaferi dhe atë kryeministër teknik. Kryeministri teknik nuk ka kompetenca as për vendime politike as për procese politike. I vetmi funksion i kësaj qeverie është organizimi i zgjedhjeve fer dhe demokratike”, ka nënvizuar Mexhiti.
Ndërkaq, në njoftimin e Kryeministrisë për këtë takim thuhet se aty diskutuan për situatën në rajonin e Ballkanit, për fqinjësinë e mirë dhe perspektivën e partneritetit të rëndësishëm ndërmjet Kosovës dhe Maqedonisë së Veriut, teksa i pranishëm ishte edhe këshilltari i kryeministrit, Bekim Qoku.
“Kryeministri Kurti i njoftoi kryetarët shqiptarë nga Maqedonia e Veriut për takimet e bisedat që ka pasur me krerët shtetërorë të Maqedonisë së Veriut dhe ata e njoftuan për zhvillimet politike atje. Temë e diskutimit ishte edhe situata shoqërore e ekonomike e komunitetit shqiptar në Maqedoni, nevoja për demokraci e stabilitet si dhe përmirësim e mbarëvajtje të raporteve mes komuniteteve etnike në atë vend, gjë të për të cilën Kosova vetë është shembull, por edhe e promovon dhe e mbështet”, thuhet në njoftim.
Tutje theksohet se katër udhëheqësit e opozitës shqiptare në Maqedoninë e Veriut shprehën propozimin e tyre për një president të Maqedonisë së Veriut, i cili mishëron bashkëjetesën mes etnive dhe garanton rrugën evropiane të Maqedonisë së Veriut, president i cili sipas tyre kësaj radhe duhet të vijë nga mesi i shqiptarëve.
