Kreu i Aleancës për Ardhmërinë e Kosovës, Ramush Haradinaj, ka takuar Senatorin amerikan, Mike Rounds, nga i cili ka kërkuar mbështetjen e tij, ndaj vendit tonë në procesin e Partneritetit për Paqe dhe anëtarësimin në NATO.
Haradinaj ka thënë se roli i Senatorit Rounds mbetet shumë i rëndësishëm në forcimin e marrëdhënieve mes Kosovës dhe ShBA-ve.
“Roli i Senatorit Mike Rounds ka qenë dhe mbetet i rëndësishëm në forcimin e marrëdhënieve miqësore mes Kosovës dhe ShBA-së. Është për t’u vlerësuar angazhimi i tij në Komitetin për Politikë të Jashtme dhe në Komitetin për Ushtrinë në Senatin amerikan, për të cilin shpreha mirënjohjen e sinqertë”, ka thënë Haradinaj.
Ai tha se ShBA-të janë aleate strategjike e pazëvendësueshme për Kosovën.
“Në takimin që zhvilluam sot në Washington, kërkova mbështetjen e tij ndaj vendit tonë në procesin e Partneritetit për Paqe dhe anëtarësimin në NATO. Gjithashtu, kam përsëritur përkushtimin e Kosovës për të qëndruar pranë ShBA-ve si aleat strategjik dhe i pazëvendësueshëm”, është shprehur Haradinaj. /Kosovatimes/
