Kryetari i Aleancës për Shqiptarët, Arben Taravari, nëpërmjet një shkrimi në Facebook, i ka bërë thirrje Kuvendit të partisë së tij që të bëhen pjesë e opozitës së bashkuar shqiptare në Maqedoninë e Veriut.
Taravari ka shkruar se” pas disa javësh konsultime e takime të shpeshta, brenda dhe jashtë subjektit që ai drejton, duke marrë parasysh sugjerimet dashamirëse të të gjithë miqve, amtarëve dhe përkrahësve, ka zgjedhur të dëgjoj edhe zërin e popullit që sipas tij, sot po flet më qartë se kurrë.
“Qytetari po kërkon ndryshim” ka shkruar Taravari, duke shtuar se, “populli po kërkon një sistem politik të çliruar nga epidemia e korrupsionit, që është bërë frenuesi më i madh për mirëqenien dhe zhvillimin e shqiptarëve në Maqedoninë e Veriut”, ka shkruar mes tjerash Taravari.
Nëse Kuvendi Qendror i kësaj partie mbështet propozimin e Taravarit, atëherë Aleanca për Shqiptarët do të garoj në zgjedhjet parlamentare të 8 majit bashkë me Lëvizjen Besa, Alternativën dhe Lidhjen Demokratike, të cilat tashmë kanë formuar koalicionin Lidhja Evropiane për Ndryshim.
Aleanca për Shqiptarët është pjesë e qeverisë aktuale dhe në të cilën përfaqësohet me tre ministri.
