Policia ka ndërmarrë masa për siguri më të madhe në trafik. Tanimë forcat e rendit kanë vënë në përdorim edhe veturat me pajisje inteligjente si dhe dronët.
Njësia rajonale e trafikut rrugor të policisë në rajonin Pejës, ka shtuar masat për rregullimin e komunikacionit dhe parandalimin e aksidenteve.
Aktualisht, policia është duke zbatuar planin operativ për rregullimin dhe sigurimin e trafikut për vitin 2024 përmes pajisjeve me dron dhe vetura inteligjente.
“Në kuadër të këtij plani janë caktuar zyrtarët policor të trafikut rajonal të punojnë me vetura me pajisje inteligjente dhe dron të trajnuar për këtë punë dhe deri tani sipas rezultateve kemi arritur që të kemi një zvogëlim të aksidenteve. Efikasiteti është i kapshëm në këtë aspekt dhe kështu do të pretendojmë të vazhdojmë në këtë drejtim natyrisht me rishikimin e planeve me rezultate që do t’i kemi në vazhdimësi në kuadër të aktiviteteve tona policore”, tha për RTK kapiteni Teki Syla, shef i njësisë së trafikut në Pejë.
Syla ka një thirrje për të gjithë qytetarët pjesëmarrës në komunikacion.
“Si shef i trafikut rajonal në Pejë apeloj tek qytetarët, përkatësisht te këmbësorët dhe vozitësit e veturave që të respektojnë ligjin dhe shenjat e komunikacionit në mënyrë që të parandalojmë aksidentet dhe mosrespektimin e ligjeve në vend”, tha ai.
Sipas zyrtarëve të policisë në Pejë, krahasuar me periudhën e njëjtë të vitit të kaluar, sipas statistikave, në janar të vitit 2024 kanë ndodhur shumë më pak aksidente në komunikacion.
