Futbollisti anglez, Ruben Loftus-Cheek, ka gjetur veten te skuadra italiane, Milan.
Pas disa sezoneve të vështira dhe zhgënjyese në Chelsea, të cilat përfshinin lëndime, huazime, dhe vendosje në pozicione të ndryshme, Loftus-Cheek deri tash ka treguar një formë të jashtëzakonshme në Serie A.
Reprezentuesi anglez ka shënuar katër gola në pesë ndeshjet e fundit të tij në kampionatin italian. Transferimi i tij në Milan, i cili u bë verën e kaluar, ishte për një vlerë rreth 15 milionë funte.
Loftus-Cheek ka folur për ndryshimin e tij te Milan. “Kam luajtur në shumë role gjatë karrierës sime. Në dy vitet e fundit, kryesisht në një pozicion mbrojtës, dhe kjo nuk ishte e natyrshme për mua. Gjithmonë më ka pëlqyer të kem topin në këmbët e mia, të kem lirinë për të krijuar, të jem vendimtar. Nuk mund ta bëja këtë në dy sezonet e fundit. Kjo mënyrë e lojës nuk më bëri të lumtur. Tani, unë luaj në një pozicion ku kam më shumë liri, kështu që ndihem mirë”, është shprehur njëzet e tetë vjeçari.
