Banka Qendrore e Republikës së Kosovës me qëllim të ofrimit të informatave plotësuese në mënyrë të thjeshtë dhe të kuptueshme për qytetarët e Republikës së Kosovës, ka lëshuar në funksion linjën telefonike pa pagesë, 0800 222-55.
Përmes një njoftimi për medie, BQK ka bërë të ditur se kjo linjë është e dedikuar për qytetarët nga komuniteti serb që jetojnë në Republikën e Kosovës dhe që kanë nevojë të informohen drejt dhe konkretisht me rregulloren e re të BQK-së.
“Përkujtojmë se Rregullorja për Operacione për Para të Gatshme: Nuk ndalon apo kufizon pranimin e mjeteve në llogaritë bankare në Euro në bankat e licencuara; Nuk kufizon aktivitetin këmbimor të cilësdo valutë që kryhen nga institucionet financiare bankare ose jo-bankare të licencuara nga BQK; Nuk ndalon transferet nga asnjë shtet; Nuk ndalon posedimin dhe kursimin në asnjë valutë jo-Euro (përfshirë Dinarin)”, thuhet në njoftim.
Tutje BQK sqaron se të gjithë individët kanë qasje në llogari bankare dhe mund të pranojnë mjete në llogaritë e tyre në Euro.
Më tej, BQK qartëson se qytetarët që ende nuk kanë llogari, mund të hapin një të tillë tek secila bankë, krejt kjo sipas ‘Rregullores së BQK-së për qasje në Llogari Pagese për Shërbime Bazike’, që për grupet e cenueshme e të skemave sociale nuk ka tarifë të hapjes e as të mirëmbajtjes, nga 1 janari 2024.
“Vetëm në katër komunat veriore, operojnë katër degë bankare, tri institucione mikro- financiare (kredidhënëse) si dhe mbi 15 institucione financiare jo-bankare për pagesa dhe këmbimore. Numri i degëve dhe zyrave të institucioneve financiare që operojnë në atë zonë është në rritje, pasi përfshirja financiare është objektiv i BQK-së”, thuhet në njoftim. /Kosovatimes/
