Ministria e Punëve të Brendshme ka njoftuar për rënien e rasteve të migrimeve të parregullta nga Kosova drejt BE-së, ndërkaq shtim të rasteve të migrimit për qëllim të punës që nga periudha e liberalizimit të vizave.
Kjo u bë e ditur sot në takimin e rregullt të koordinatorit kombëtar për Migrim, njëherit zëvendësministër i Punëve të Brendshme, Blerim Gashani me Atashetë e Migrimit të ambasadave të huaja në Kosovë.
“Gashani tha se që nga fillimi i zhvillimit të politikave të migracionit të artikuluar në kuadër të dokumenteve strategjike, fokusi kryesor ka qenë tek parandalimi i migracionit të parregullt dhe garantimi i migrimit të sigurt, të organizuar dhe të rregullt. Dhe kjo qasje e ndërtuar ndër vite ka dhënë rezultatet e saj dhe tashmë tendencat e migracionit, veçanërisht migracioni i parregullt nga Kosova drejt Bashkimit Evropian, ka shënuar një zvogëlim të ndjeshëm, ndërsa trendi i migracionit të rregullt, veçanërisht për qëllime të punësimit, është në rritje”, thuhet në komunikatën e MPB-së.
Në këtë takim zëvendësministri Gashani, vuri në dukje se në fushën e legjislacionit gjatë tremujorit të parë të këtij viti, pritet miratimi i Ligjit të ri për të Huajt.
“Në kuadër të këtij projektligji kemi përfshirë disa çështje me rëndësi, të cilat padyshim se do të avancojnë sistemin për menaxhimin e migrimit në vend. Fokus i veçantë i është kushtuar parimeve ndërkombëtare për mbrojtjen e të drejtave të njeriut si dhe direktivave të BE-së që kanë të bëjnë me trajtimin dhe kthimin e migrantëve me qëndrim të parregullt në territorin e Republikës së Kosovës”, theksoi zëvendësministri Gashani. /Kosovatimes/
